Rí­key Ofurbloggari!

Sæl börnin góð.
Hvað segið þið gott í dag.

Við segjum allt ágætt hérna í Áló. Sólin er farin að skína, snjórinn farinn og vor í lofti. Það er nú samt ekki orðið heitt ennþá en það kemur.

Það styttist í að við komum heim, ekki nema 10 dagar í það. Það er allt á fullu í undirbúningi fyrir heimferð og skírn. Það er ekkert smá mikið vesen búið að vera að fá nafnið á stúfinn skráð. Það verður að vera búið að gefa honum nafn hér í DK áður en hann er skírður heima og þar sem það er nýbúið að breyta öllum ömtum í region, og þar af leiðandi búið að færa til í hver sér um hvað í sambandi við hluti, þá er allt í rugli. Við töluðum fyrst við kirkekontoret en gellan áttaði sig ekki á því að þar sem þetta er íslenskt nafn, þá gilda aðrar reglur, og sendi okkur niður í bæ á statsforvaltningen, nema þeir eru hættir að sjá um þetta nema sóknin ákveði að þeir þurfi að skipta sér af nafninu. Við fórum því í dag aftur á kirkekontoret til að redda þessu, en afleysingargellan sem er venjulega var leyst af af annarri núna og hún vissi ekkert um hvernig þetta færi fram og við þurfum því að bíða þar til á morgun til að vita hvort barnið geti loksins fengið nafn.
Þvílík og endemis endavitleysa. Ég þoli ekki að þurfa að eltast við svona.

Friðgeir, Anna Sigga og Ninja Tíbrá komu í heimsókn í gær og enduðu á því að borða með okkur kvöldmat. Við elduðum dírindis pítsu, eina með pestói því guttinn þolir illa tómata.
Við Anna Sigga ákváðum svo að fara í bæinn á miðvikudaginn, en okkur var boðið að vera með í mömmumorgnum með fleiri stelpum frá Íslandi og þær ætla að hittast á miðvikudaginn þannig að við förum bara í bæinn eftir það ef við nennum.

Ég fór í gær inn í herbergi að ná í dót fyrir strákinn og rak tærnar á mér mjög illa í stól á leiðinni til baka og ein táin á mér er öll bólgin og blá og marin. Þetta er ennþá mjög vont en ég held nú að hún sé ekki brotin. Ég er farin að geta beygt hana núna.
Þessi árátta í fjölskyldunni hans Hauks með að reka sig í allt er greinilega smitandi.

Á morgun förum við svo að hitta hinn mömmuhópinn og þá verður hann mældur og vigtaður. Það verður spennandi að sjá hvað hann hefur stækkað. Ég held að hann hljóti að vera kominn yfir 6 kg. Það verður upplýst á einhverjum af síðunum hans seinna.

Jæja. Þarf að fara að drífa strákinn inn.
Later,
Ríkey

Jæja, kominn tími til að blogga aftur, held ég.
Við bíðum enn eftir þessu blessaða barni. Það virðist bara ætla að vera þarna inni endalaust. Ég vona bara að það verið komið úr fyrir næsta sumar.
Annars er ég sett í dag hér í Danmörku, þannig að það eru í mesta lagi 2 vikur þangað til barnið kemur. Að hugsa sér það. Heima á Íslandi er ég sett 21. des. sem er réttara, og það sem ég miða við. Það er nú bara eftir 2 daga samt. Ég vona bara að þetta verði ekki jólabarn.

Ég náði ekki að skila verkefninu og hef fengið frest til að skila í mars. Ég tek svo líka prófið um miðjan mars. Ég vona að það gangi að klára að skrifa verkefni með barn í fanginu. Ég verð að fara að æfa mig í að nota aðra hendi við að skrifa og teikna. Maður getur nú ekki lagt barnið frá sér, er það?

Þó ég sé hætt að vinna þetta verkefni í bili hef ég sko aldeilis ekki setið á rassinum... allavega ekki mikið.
Ég er búin að baka 4 smákökusortir og er búin að vera á fullu að klára jólagjafainnkaup og að senda það heim. Svo skrifuðum við jólakort í dag og ætlum að rölta niður á pósthús á eftir og senda þau. Þá er allavega búið að redda því.
Svo þarf reyndar að gera smá jólahreingerningu. Aðeins að þurrka af og svona. Já og ekki má gleyma jólamatnum heldur. Ætlum að ná í hamborgarhrygginn hjá slátraranum í dag.
Við erum líka alveg að verða tilbúin með allt fyrir barnið. Barnavagn, rimlarúm og skiptiborð eru á sínum stað, og flest smádót komið, eins og krem og bleyjur, eða allavega prufur. Svo erum við komin með fullt af fötum, nýjum og notuðum, eiginlega allt gjafir frá vinum og vandamönnum. Það er auðvitað alveg ómetanlegt og varla hægt að þakka nógu mikið fyrir alla hjálpina sem við höfum fengið. Núna vantar bara barnið...

Já það er sko aldeilis mikið um að vera á þessum bæ. Ótrúlegt hvað allt gerist alltaf í einu.

Í byrjun Desember komu Anna og Hjölli í heimsókn, auðvitað með Jóhannes Þór með sér, og svo fylgdi Kári með í kaupbæti. Ekki nóg með það, heldur komu Sigga "systir" og krakkarnir og nýji kærastinn líka frá Svíþjóð. Reyndar stoppuðu þau ekki nema í einn dag. Það var haldin heljarinnar átveisla eitt kvöldið, sem reyndar byrjaði heldur seint, þar sem við stelpurnar ákváðum að skreppa á H&M Clubaften, akkúrat á matmálstíma.
Veislan heppnaðist vel, og Haukurinn stóð sig vel sem aðal skipuleggjari og stjörnukokkur.

Það er sko alltaf fjör í Álaborg!

Bið að heilsa í bili.
Ríkey.

Ég er í leiðinlegasta tíma í heimi, með mest óspennandi kennara í heimi. Það er pása og ég ákvað að blogga smá... kannski kominn tími til.

Þess önn í skólanum er svolítið öðruvísi en venjulega. Ég er komin á 7. önn og þar af leiðandi í masterinn, og helmingurinn af krökkunum sem voru hérna í fyrra eru annað hvort í praktík eða að gera eitthvað annað spennandi. En það þýðir ekki að við séum eitthvað færri... það er bara búið að skipta þeim út fyrir útlendinga. Þeir koma frá hinum ýmsu löndum, Mexico, Lettlandi og ég veit ekki hvað og hvað....

Annars hefur það lítil áhrif á mig, þar sem ég er ein í hóp. Það gengur svona upp og ofan, stundum er ég bjartsýn á að ná að skila og stundum er ég viss um að geta það ekki. Akkúrat í augnablikinu gengur vel, en við sjáum hversu lengi það endist.

Litli mallakútur stækkar og stækkar og er væntanlegur í heimin eftir hvorki meira né minna en 7 vikur. Það er ekkert smá hvað þetta er fljótt að líða, en samt alveg hrikalega lengi. Ég verð nú líka að segja að það getur verið frekar truflandi stundum að hafa hann þarna, þegar ég þarf að einbeita mér að náminu. Ég lít bara á þetta sem ágætis samvinnu, hann lætur mig vita þegar honum finnst ég þurfa að taka mér pásu.

Jæja, ég þarf að fara að gera einhverja æfingu fyrir þennan blessaða fyrirlestur. Ég býst við því að Smjattpatti bloggi bráðum, og setji inn alveg glænýjar myndir.

Ríkey.

Jæja, þá er skólinn byrjaður með trompi og ekkert smá mikið að gera. Núna er ég í einhverjum filosofíukúrsum sem ég botna lítið sem ekkert í. Svo eigum við að skila ritgerð. Eftir það byrjar svo sjálft verkefnið, sem ég ætla að gera ein í þetta skiptið.
Ég hef tekið eftir því að fólk á erfitt með að komast inn á síðuna sem ég setti inn um dagin, enda breyttum við henni þannig að ekki hver sem er kemst inn. Allavega, þegar smellt er á linkinn hérna til vinstri þá er fólk beðið um að ath. hvort það hafi aðgang að síðunni með því að smella á link. Þar er hægt að skrá sig inn með því að nota sama nafn og lykilorð og á messenger, og aðeins þeir sem eru skráðir á messenger hjá mér komast inn. Ef þið viljið kíkja á síðuna getiði bara addað mér inn á messenger hjá ykkur, og kannski látið mig vita af því svo ég hendi ykkur ekki út því ég kannast ekki við ykkur, eða sent mér skilaboð með netfanginu ykkar svo ég geti bætt ykkur á "vinalistann", en þá kemur það líka upp á síðunni held ég... Ég allavega vona að þið getið fundið út úr þessu.
Allavega. Best að fara að læra.
Ble...

Loksins erum við komin heim til Álaborgar aftur. Skólinn byrjar á mánudaginn þannig að maður reynir að slappa af og redda hlutum áður.

Það gæti verið að við förum með Höllu að leika í kvikmynd um helgina. Ég læt allavega vita hvað verður úr því. Ekki slæmt að vera aukaleikari í stórmynd.. híhí.

Það er afmæliskaffi hjá Didda á eftir. Hann er gamall í dag. Allavega 27 ára.

Það gleður mitt litla hjarta að sjá hve margir líta ennþá hingað inn. Og til að gleðja ykkar litla hjarta þá setti ég inn link á nýja síðu sem sum ykkar hefðuð kannski gaman af að kíkja inn á annað slagið.

Bið að heilsa í bili.
Ríkey

Jæja... þetta er nú meiri bloggletin. Ég nenni bara ekki að blogga í sumarfríinu mínu.

Smá update:
Heimferðin var hræðileg, lestinni seinkaði vegna þess að það kviknaði í teinunum, missti af fluginu en DSB borgaði fyrir að breyta miðanum, fékk far kl 11 um kvöldið, átti að fara kl 2, en þegar ég kom á flugvöllinn fékk ég að breyta miðanum aftur, án endurgjalds, til kl 8. Þessi yndislega kona sem ég talaði við bjargaði gjörsamlega lífi mínu. Ég sat svo bara úti í sólinni í nokkra tíma og lét mér leiðast... aaalein!
Setti svo þjófavarnarkerfið nokkrum sinnum í gang hjá tengdó... ég og Securitas gaurarnir erum "like this" núna...

Brúðkaupið var æðislegt og gekk eins og í sögu. Það kom meira að segja mynd af mér í Brúðkaupsþættinum Já, enda var ég alltaf eitthvað að flækjast í kringum Tinnu að reyna að hjálpa henni, og svo var ég skipuð yfirljósmyndari í veislunni og tók myndir bæði á vélina hennar Lilju og Tinnu, þannig að það var mikið að gera.

Anna og Hjölli eignuðust lítinn gullmola 10. ágúst, 2 vikum eftir tímann. Ég hlakka ekkert smá til að hitta þau og sjá litla kút... vonandi náum við að hittast í bænum eftir helgi. Endilega kíkið á hann. Hann er algjör rófa...

Sumarið er búið að vera æðislegt hérna fyrir austan, sérstaklega í blíðunni sem er búin að vera undanfarið. Ég fékk meira að segja 2 vikur í sumarfrí um daginn. Það hefur ekki gerst síðan ég man eftir mér liggur við. Hef alltaf verið að vinna á fullu á sumrin.

Við förum suður á laugardaginn og heim á miðvikudaginn. Okkur er nú soldið farið að hlakka til að komast heim til okkar. Skólinn byrjar 4. sept... :(

Ég gæfi nú mikið til að vita hvort einhver kíki hingað inn lengur... fólk er örugglega löngu búið að gefast upp á að bíða eftir bloggi... en betra er seint en aldrei segi ég nú bara. Endilega látið vita af ykkur og verið dugleg að kommenta... smá manntal í gangi...

Jæja, ætla að fara í hádegismat... bæjó.
Ríkey.